Farg‘ona tumani "Xo‘ja Ahmad Vale" mahalla fuqarolar yig‘inidagi so‘lim "Chinor tagi" istirohat bog‘ida "Qo‘shnichilik — ming yilchilik" shiori ostida fayzli va ma‘naviyatga boy tadbirlar tashkil etildi. Bu maskanda do‘stlik va ahillik ruhi jo‘sh urdi, har bir burchak milliy qadriyatlar bilan bezandi. Tadbirlar doirasida mohir usta-hunarmandlarning nafis asarlari namoyish etildi, kitob yarmarkasi esa bilimga tashna yuraklarni bir joyga jamladi. Mahalla fuqarolar yig‘inlari va turli tashkilotlar o‘rtasida osh tanlovi bo‘lib o‘tdi, unda pazandachilik sirlarini puxta egallagan oshpazlar mahoratini namoyish etdi. Shu bilan birga, sumalak va halim kabi milliy taomlar shirin tabassum ila ishtirokchilarga ulashildi, bu esa bayramga yanada fayz bag‘ishladi. Sport musobaqalari ham jo‘shqin kayfiyatda o‘tdi. Stol tennisi, shaxmat va shashka bo‘yicha bilimdon sportchilar bellashdi, tomoshabinlar esa ularning har bir harakatini hayajon bilan kuzatdi. Shuningdek, sahnalashtirilgan sport chiqishlari, dor tomoshalari va polvon tosh o‘yinlari ishtirokchilar qalbida milliy ruhni jonlantirdi. Ushbu bahoriy tadbir mahalla ahli va mehmonlar qalbida unutilmas xotiralar qoldirdi. Qo‘shnichilik, mehr-oqibat va milliy qadriyatlarni yanada mustahkamlashga xizmat qiladigan bunday go‘zal an‘analar kelgusida ham davom ettirilishi rejalashtirilgan.