Quvasoy shahridagi "Blue Carbon” MChJ qo‘shma korxonasida qishloq xo‘jaligi sohasida, xususan, nasos agregatlari va tik sug‘orish quduqlarini ishlatishda qayta tiklanuvchi energiya manbalaridan foydalanish samaradorligi masalalariga bag‘ishlangan ko‘rgazmali seminar bo‘lib o‘tdi. Unda viloyat hokimi Xayrullo Bozorov, viloyat prokurori Baxtiyor Ismoilov, shahar-tumanlar hokimlarining qishloq va suv xo‘jaligi masalalari bo‘yicha o‘rinbosarlari, soha mutasaddilari, tijorat banklari vakillari, fermerlar ishtirok etdi. Dastlab seminar ishtirokchilari shu yerdagi bog‘dorchilik fermer xo‘jaligida o‘rnatilgan quyosh panelining ishlash jarayoni va afzalliklari bilan tanishdilar. 50 kVt/soat quyosh panel stansiyasining hozirgi kundagi narxi 165 mln so‘m. Hisob-kitobga ko‘ra, u 1,5 yilda o‘zini oqlaydi hamda 25 yil kafolatga ega. Bu esa fermerlarning energiya xarajatlarini keskin kamayishi hamda manfaatdorligiga xizmat qiladi. Ko‘rgazmali seminarda viloyat rahbari suv – bebaho boylik, inson hayotining asosiy manbai ekanligini, so‘nggi yillarda suv resurslarining kamayib borayotganligi bois undan oqilona foydalanish dolzarb muammoga aylanganligi haqida so‘z yuritdi. Hukumatimiz tomonidan suv resurslarini tejash va samarali boshqarishga qaratilgan islohotlar va texnologiyalar joriy etishga muhim e‘tibor qaratilayotganligi qayd etildi. Viloyatimizda ham suv tejovchi sug‘orish tizimlarini joriy etish, irrigasiya kanallarini modernizasiya qilish va nasos stansiyalarini energiya tejamkor texnologiyalarga almashtirish bosqichma-bosqich davom etayotganligi bildirildi. Bunda sug‘orish tizimlariga energiya tejovchi texnologiyalarini, xususan, quyosh panellarini joriy etishda o‘ziga xos tajriba yaratilayotganligi hamda uni barcha hududlarda ommalashtirish zarurligi ta‘kidlanib, mazkur yo‘nalishda amalga oshiriladigan chora-tadbirlar belgilandi. Viloyat hokimining o‘rinbosari Alibek Tursunov viloyatimizda suv va energiya tejovchi texnologiyalarni qo‘llash borasida amalga oshirilayotgan ishlar hamda kelgusidagi vazifalar bo‘yicha ma‘lumot berdi. O‘tgan yilda ish boshlagan “Blue Carbon” qo‘shma korxonasida zamonaviy va sifatli monokristal quyosh panellari va energiya tejamkor ko‘cha yoritish moslamalar chiqarilmoqda. Seminarda korxona faoliyati taqdimot qilinib, nasos agregatlari va tik sug‘orish quduqlarida elektr energiya sarfini muqobil energiyaga o‘tkazish, ya‘ni quyosh panellaridan foydalanishni keng yo‘lga qo‘yish borasida takliflar bildirildi. Sohaga ajratilayotgan kreditlar bo‘yicha tushuntirishlar berildi. Viloyat rahbari tomonidan seminar yakunida hududlardagi sug‘orish tizimlariga qayta tiklanuvchi energiya manbalarini joriy qilish, buning uchun kreditlar ajratish borasida topshiriqlar berildi. Ma‘lumot o‘rnida: Bugungi kunda Farg‘ona viloyatida 130 ming gektardan ortiq ekin maydonlarini sug‘orish va erlarni meliorativ holatini yaxshilash uchun 168 ta nasos stansiya va 2 303 ta tik quduqlari xizmat qiladi. 1053 dona tik sug‘orish quduqlari mazkur quduqlardan foydalanuvchilar hisobiga o‘tkazilib, elektr energiya to‘lovlari ular tomonidan amalga oshirilmoqda.