Tantanali marosimda viloyat hokimi Xayrullo Bozorov, viloyat huquqni muhofaza qiluvchi idoralar rahbarlari, viloyat qo‘riqlash boshqarmasi mas‘ullari, tuman qo‘riqlash bo‘limi shaxsiy tarkibi hamda faxriylar ishtirok etdi. Tadbirda viloyat hokimi so‘nggi yillarda barcha sohalarda bo‘lgani kabi qo‘riqlash xizmatiga ham katta e‘tibor qaratilib, sohani chinakam xalqchil va professional tuzilmaga aylantirish borasida keng ko‘lamli ishlar bajarilgani, tizimga innovasion yondashuvlar, raqamli texnologiyalar va ilm-fan yutuqlari joriy qilinib, fuqarolarning xonadonlarini va ob‘ektlarini qo‘riqlash hamda himoya qilish bo‘yicha ilg‘or xorijiy tajribalar yo‘lga qo‘yilayotganini qayd etdi. 3 mlrd so‘mdan ziyod mablag‘ evaziga zamon talablariga mos ravishda barpo etilgan ushbu maskan ham shaxsiy tarkib uchun munosib tuhfa bo‘lganligi ta‘kidlandi. Bunday e‘tibor, yaratilgan shart-sharoitlar barcha xodimlarga yurt osudaligi, aholi tinchligini asrash va himoya qilish, jamoat tartibini saqlash va xavfsizlikni ta‘minlash, jismoniy va yuridik shaxslarni mol-mulklarini kafolatli qo‘riqlashda yanada kuch-quvvat hamda shijoat bag‘ishlashiga ishonch bildirildi. Tadbirda qo‘riqlash bo‘limlariga zamonaviy xizmat avtomobillari tantanali topshirildi. Ramziy lenta qirqilib, zamonaviy qiyofa kasb etgan binoda yaratilgan shart-sharoit va qulayliklar bilan yaqindan tanishildi. Ma‘lumot o‘rnida, 2024-yilda shahar-tuman qo‘riqlash bo‘limlarining infratuzilmasi tubdan yangilanib, xodimlarga zamonaviy shart-sharoitlar yaratish maqsadida Qo‘qon, Quvasoy, Marg‘ilon shaharlari, Beshariq, O‘zbekiston, Dang‘ara, Rishton, Yozyovon tumanlari ma‘muriy binolarida qurilish va rekonstruksiya ishlari olib borilib, xizmatda foydalanish uchun topshirilgan.