1. Бош сахифа
2. Янгиликлар

ТОШЛОҚДА ҚУРОЛЛИ КУЧЛАРИМИЗ ТАШКИЛ ЭТИЛГАНЛИГИНИНГ 31 ЙИЛЛИГИ ҲАМДА ВАТАН ҲИМОЯЧИЛАРИ КУНИГА БАҒИШЛАНГАН ТАДБИР БЎЛИБ ЎТДИ

×

    Президентимизнинг “Ўзбекистон Республикаси Қуролли Кучлари ташкил этилганлигининг 31 йиллигини ҳамда Ватан ҳимоячилари кунини нишонлашга тайёргарлик кўриш ва ўтказиш чора-тадбирлари тўғрисида”ги фармойиши асосида, юртимиз бўйлаб “Миллий армиямиз – Янги Ўзбекистоннинг мустаҳкам қалқонидир!” шиори остида Қуролли Кучларимиз ташкил этилганлигининг 31 йиллиги ҳамда Ватан ҳимоячилари кунига бағишланган маънавий-маърифий, маданий тадбирлар ўтказилмоқда.
    Бугун Тошлоқ туманида ҳам 14 январь - Ватан ҳимоячилари куни муносабати билан байрам тадбири ўтказилди. Унда туман ҳокимлиги, секторлар раҳбарлари, нафақaдаги ҳарбийлар, байналмилалчи жангчилар, ҳарбийлар, меҳнат фахрийлари, кенг жамоатчилик ҳамда оммавий ахборот воситалари вакиллари иштирок этди.
    Дастлаб, туман марказида офицер, сержант ва аскарларнинг оркестр садолари остидаги ҳарбий паради бўлиб ўтди. Шундан сўнг, Ватан ҳимоячилари кунига бағишланган байрам тадбири 2-умумтаълим мактабида давом этди. Тадбирда қурол-яроқ ҳамда ҳарбий техникалар намойиши байрам иштирокчиларида жуда катта таассурот қолдирди. 
     Тадбирда туман ҳокими Абдуқаҳҳор Джурабаев сўзга чиқиб, барчани 14 январь – Ватан ҳимоячилари куни ва Қуролли Кучлар ташкил этилганлигининг 31 йиллиги байрами билан самимий муборакбод этди. Мамлакатимизда миллий армиямиз изчил ривожланиб бораётганини, унинг жанговар қобилияти ортиб, мудофаа қудратимиз мустаҳкамланаётгани, халқимизнинг осойишта ҳаёти таъминланаётганини таъкидлаб ўтди.  Шундан сўнг,  бир гуруҳ ҳарбий хизматчилар ҳамда меҳнат фахрийлари туман ҳокимининг ташаккурномалари ва қимматбаҳо совғалари билан тақдирланди.
     Тадбирда ҳарбийларнинг кўргазмали чиқишлари, ёшларнинг ватан, тинчликни мадҳ этувчи шеърлари ҳамда туман маданият бўлими томонидан ижро этилган куй-қўшиқлар барчага хуш кайфият улашди.