Ҳурматли тошлоқликлар маълумки, мамлакатимизда ҳаво ҳароратининг кескин пасайиши муносабати билан коммунал соҳаларда носозликлар келиб чиқмоқда. Айниқса, хозирги кунда электр ва газ таъминотига бўлган талаб ортиб бораётганлиги айни ҳақиқатдир. Тошлоқ туманида аҳолини аномал совуқ кунларидан талофатсиз олиб чиқиш бўйича зарурий чора-тадбирлар амалга ошириляпти. Хусусан, туну кун 24 соат давомида фаолият кўрсатадиган штаб ташкил этилиб, штабда электр, газ, сув таъминотида ҳамда ижтимоий соҳа объектларида юзага келаётган муаммоли вазиятларни бартараф этиш учун соҳа мутахассислари жалб этилган. Штаб аъзолари томонидан аҳолидан келиб тушаётган мурожаатлар тезкор (оператив) равишда бартараф этиш чоралари кўрилмоқда.
Аномал совуқ ҳарорат давом этаётганлиги сабабли қувурларда газ босими кескин пасайиши кузатилмоқда. Шу муносабат билан табиий газни биринчи навбатда аҳоли хонадонлари, ижтимоий соҳа объектларига етказиб бериш чоралари кўрилмоқда. Шу мақсадда автомобилларга газ тўлдириш компрессор шохобчалари 2 кунлик муддатга вақтинча тўхтатилишини маълум қиламиз. Имкон қадар жамоат транспортларидан фойдаланишингизни сўраймиз. Шунингдек, автомобилларга ёқилғи қуйиш талабини тўлиқ қондириш мақсадида Аи-80 маркали бензин ва дизел ёқилғиси маҳсулотлари қўшимча миқдорларда сотувга чиқарилади ва уларни нархини сунъий ошиб кетишини олдини олиш бўйича қатъий назорат ўрнатилади.
Қадрли тошлоқликлар!
Республикамизда кузатилаётган ноқулай об-ҳаво шароити, аномал совуқ ҳаво ҳарорати қалби қайноқ тошлоқликларни қўрқита олмайди. Аммо ҳозир, шу лаҳзада, бир мушт бўлиб, жамият бўлиб қиш совуғидан ўтиб олмасак бўлмайди. Бу бизнинг қўлимиздан келади. Барчамиз учун синов бўлган шу кунларда табиий газ, ўтин-кўмирдан фойдаланганда техника ва ёнғин хавфсизлиги қоидаларига қатъий риоя қилишингизни, ис газидан эҳтиёт бўлишингизни, зарурат бўлмаганда уйда қолишингизни ҳамда хонадонингизда электр энергияси ва табиий газдан тежамкорлик билан фойдаланишингизни сўраймиз.
Ҳурматли ватандошлар!
Агар сиз автобензин маҳсулотларининг сотилишида қандайдир чекловлар жорий этилгани, нархнинг асоссиз оширилгани ёки бу маҳсулотларнинг ноқонуний савдосига дуч келсангиз, зудлик билан туман ҳокимлигида ташкилланган марказий штабга (73) 238-11-00 телефон рақами орқали мурожаат қилишингиз мумкин. Мурожаатингиз ўз вақтида кўриб чиқилиши ва тегишли тартибда бартараф этилишини кафолатлайман.
