Тошлоқ туманидаги Заркент МФЙда “Ёшлар кинокарвони” лойиҳаси доирасида Ўзбекистон Киноматография агентлигининг таниқли актёр ва актрисалари Шохида Узоқова, Умид Искандаров, Йигитали Мамажонов, Муқаддас Садуллаева, Хуршид Тўхтаев ва бир қатор таниқли санъаткорлар иштирокида аҳоли ва ёшлар билан ижодий учрашув бўлиб ўтди. «Кинокарвон» лойиҳаси аҳоли томонидан жуда илиқ кутиб олинди. Дастлаб тадбирда туман ҳокими Абдуқаҳҳор Джурабаев сўзга чиқиб, мамлакатимиз бўйлаб ташкил этилаётган ушбу лойиҳа доирасидаги тадбирлар аҳолини маданий хордиқ чиқаришига катта хизмат қилаётганлигини айтиб ўтди. Тадбирда тумандаги умумтаълим мактабларини намунали тамомлаган 43 нафар битирувчи йигит ва қизларга олтин ҳамда кумуш медаллар тантанали равишда топширилди. Тадбир давомида меҳмонлар сўзга чиқиб, “Ёшлар кинокарвони” лойиҳаси доирасида амалга оширилаётган учрашувлар ҳусусида ҳамда юртимизда амалга оширилаётган туб ислоҳотлар борасида алоҳида тўхталиб ўтдилар. Шунингдек, аҳолига юқори кайфият улашиш мақсадида концерт дастури ҳам намойиш этилди.
