1. Бош сахифа
2. Янгиликлар

ДОЛЗАРБ ДАМЛАР ҚАДРИ

Президентимиз Ш. Мирзиёев раислигида 29 май куни бўлиб ўтган  видеоселектор йиғилишида мамлакатимизда 1 июндан 1 июлгача “Ғўзада кафолатли ҳосил яратиш зарбдор ойлиги” деб эълон қилинганлиги айни кунда  ҳар бир фермер, қишлоқ хўжалиги мутахассисини ана шу даврда янада фаолроқ ишлаш, ғўза парваришида ги ҳар бир агротехник тадбирни  ўз вақтида ва зарур талаблар асосида ўтказишга даъват этмоқда.

Дарҳақиқат бу йил баҳорнинг салқин ҳамда қуруқ келиши пахтакорлар учун ҳам  жиддий ташвиш келтирмоқда. Ўсимликка шира, трипс, томир қурти ва бошқа зараркунандаларнинг хавф солиши, экинларнинг ҳавонинг паст келганлиги туфайли етарли иссиқликни ололмаётганлиги уларнинг ривожида қўшимча ишлов ва эътиборни талаб қиляпти. Бугунги куннинг долзарб вазифаларидан бири ғўза қатор ораларида техникалардан самарали фойдаланиш, ерни оби-тобида юмшатиш орқали экинни иссиқликка бўлган талабини янада оширишдан  иборатдир. Қолаверса иккинчи озиқлантиришни ўз вақтида амалга ошириш керак.

6300 гектар ерда пахта етиштираётган туманимизда ҳам ҳар гектар ер ҳисобига 10 тоннадан маҳаллий ўғитни далага чиқариш, бошланаётган суғориш мавсумини фақат шарбат усулида ўтказиш муҳим талаблардан бири бўлиб турибди. Қолаверса яна бир хавф—пахта шоналашиданоқ кўсак қуртининг экинга хавф солишини олдини олиш мақсадида унга қарши биологик ва кимёвий омиллардан фойдаланган ҳолда чоралар кўришни вақт тақазо этяпти. Туман бўйича айни кунда 118 та культиватор, 26 та ОВХ, 8 та ОШУ аппаратлари мавжуд бўлиб улардан самарали фойдаланиш бўйича фермер хўжаликлари, ММТПлар кесимида тадбирлар ишлаб чиқилди. Бундан ташқари 4000 гектар ерга чигитнинг қўшқатор усулида экилганлиги эътиборга олиниб ана шу майдонлардаги экинларга  алоҳида ишлов бериш бўйича тадбирлар амалга ошириляпти.

Туманда жорий йилда кутилаётган сув танқислиги қийинчиликларини бартараф этиш бўйича ҳар бир фермер ва мутахассисларга кенг миқёсда тушунтириш ишлари олиб борилиб ерда намликни сақлаш мақсадида маҳаллий ўғитлардан кўпроқ фойдаланиш бўйича тавсиялар берилмоқда. 

Республикамиз миқёсида ўтказилаётган “Ғўзада кафолатли ҳосил яратиш зарбдор ойлиги” туманимизда ҳам юксак уюшқоқлик, фермер ва мутахассисларимизнинг фаоллигида ўтаётганлигини ғўза парваришида олиб борилаётган агротехник тадбирлардан ҳам билиб олиш қийин эмас. Деҳқонларимиз мўл ва сара пахта ҳосили етиштиришда ушбу долзарб дамларнинг ҳар дақиқасидан омилкорлик билан фойдаланишга ҳаракат қилмоқдалар.

И. Ғофуров,

туман қишлоқ хўжалиги бўлими бошлиғининг  ўринбосари.