Юридик ва жисмоний шахслар томонидан веб сайт орқали бўлган мурожаатлар
Жами мурожаатлар: 38Ишонч телефони статистикаси
АФРИКА ЛАҚҚА БАЛИҒИ... ЯНГИЙЎЛДА БОҚИЛЯПТИ
2018-06-12 10:12:17 491
Кейинги йилларда юртимизда қатор соҳалар сингари балиқчиликка ҳам эътибор кучайди. Чунки озиқ-овқат хавфсизлигини таъминлаш, аҳоли дастурхонининг тўкин бўлишида фойдали оқсилларга бой ва тўйимли балиқ гўштининг ҳам ўз ўрни бор. Балиқчилик фермер хўжаликларининг кўплаб ташкил этилаётганлиги, фуқароларнинг ички имкониятлар ҳисобига хонадонларида ҳам балиқ боқишни йўлга қўяётганликлари, балиқ парваришида интенсив технологиялардан оқилона фойдаланилаётганлиги боис уни етиштириш кўпайиб бормоқда. Ана шундай саховатли ишга бош қўшиб йил сайин балиқ парваришини кенгайтириб эл дастурхонига сара маҳсулотлар етказиб бераётганлар қаторида Янгийўл маҳалла фуқаролар йиғини ҳудудидаги Зоиржон Набиев бошлиқ “Набиев Солижон Набиевич” фермер хўжалиги жамоаси ҳам бор.
Уч гектар ерда фаолият олиб бораётган балиқчилик фермер хўжалигида мана иккинчи йилдирки африка лаққа балиғини боқиш ҳам йўлга қўйилди. Хўжаликдагиларнинг айтишича бир мавсум давомида олди балиқнинг оғирлиги 5 килограммни ташкил этиши мумкин экан. Ўтган йили бу кўрсаткич қайд этилди ҳам. Балиқчилар 7 тоннадан ортиқ балиқни аҳоли дастурхонига тортиқ этишди.
Жорий йилда ҳам хўжаликдаги махсус сув ҳавзасига 7 минг дона ҳар бири 25 грамм атрофида бўлган африка лаққа балиқлари ташланган. Уларни боқиш зарур талаблар асосида олиб борилмоқда.
—Африка лаққа балиғи тез семиради,—дейди фермернинг отаси Солижон Набиев.—Шунга яраша “нозик” томонлари ҳам бор. Сабаби у гўштхўр ҳисобланиб ҳайвонларнинг ичак-чавоқларини махсус қиймалагичлардан ўтказган ҳолда беришга ҳам тўғри келади. Яна африка лаққа балиғининг совуққа йўқлигини ҳам айтинг. Ҳозир 20х4 метр ҳажмда махсус чуқур ҳозирлашни ниҳоясига етказяпмиз. Кузнинг совуқ кунлари бошланди дегунча унинг усти плёнка билан ўралади. Африка лаққа балиқларини ҳавзадан олиб то сотилгунча ана шу жойда боқамиз. Зоиржонга барча ишларда ўғлим Отабек, жияним Улуғбеклар ёрдам бериб келяптилар.
Фермер хўжалигида бундан ташқари сув ҳавзасига дўнг пешона, оқ амур, сазан балиқларидан 10 минг донадан ортиқ ташланиб уларнинг парвариши ҳам қизғин олиб бориляпти. Бу борада хўжалик балиқчиларига Фарғона “Ипотека” банкидан олинган 25 миллион сўм миқдоридаги имтиёзли кредит асқотяпти.
Й. Мамаев,
“Тошлоқ тонги”нинг махсус мухбири.
