1. Бош сахифа
2. Янгиликлар

СИФАТЛИ ВА БЕЖИРИМ МАҲСУЛОТЛАР

Эндигина фаолият бошлаган “Элемент кристал” масъулияти чекланган жамиятида рўзғор учун зарур электр чойнак ва термослар ишлаб чиқариш йўлга қўйилди

Корхона раҳбари Жасурбек Собировнинг саъй-ҳаракатлари билан 15 дан ортиқ ишсиз фуқаролар доимий иш билан таъминланди. Фаолиятни йўлга қўйиш учун тадбиркор тижорат банкидан 300 минг АҚШ доллари миқдорида имтиёзли кредит олиб ушбу маблағ ҳисобига Хитой республикасидан 7 та дастгоҳ сотиб олди. Бунинг эвазига эса электрон чойнак ва термослар ишлаб чиқаришнинг барча босқичларини шу ернинг ўзида бажариш имконияти яратилди.

Икки сменада ташкил этилган фаолият натижасида бир ой давомида 5000 дона тефаль ва яна шунча термослар ишлаб чиқилиб ички бозоримизни арзон ва сифатли маҳсулотлар билан таъминлашга эришилмоқда. Жамиятда ишчи ходимларга қулай иш ва дам олиш шароитлари яратилган бўлиб, ойликлар ўз вақтида бериб борилмоқда.

- Ишлаб чиқараётган маҳсулотларимиз эътибор ва қунт талаб этади. Ҳар бир жараёнга масъулият билан ёндошиб маҳсулотларимизни бенуқсон чиқаришга ҳаракат қиламиз. Тайёр маҳсулотларнинг ҳар бири текширувдан ўтказилгандан сўнггина сотувга чиқарилади, -дейди  корхона ишчиси Гулнорахон Жалолова.

Бугун корхонада Башоратхон Мадраҳимова, Оҳунжон Олимов, Жумавой Эргашев, Жамшид Норматов, Салоҳиддин Нишонов сингари ишчилар аҳил бир оиладек фаолият юритиб келишмоқда. Улар тайёрлаётган маҳсулотлар бугун ички бозорларимиз орқали ҳар бир хонадонга кириб бораётган бўлса, тез орада ташқи бозор учун ҳам тайёрланиши кўзда тутилмоқда. Бу албатта жамият ходимлари учун моддий манфаат келтириш билан бирга юртимиз иқтисодиёти учун ҳам ўз хиссасини қўшиши табиий.

Ҳуснидахон Якубова,

“Тошлоқ тонги” мухбири.