Бугун Тошлоқ тумани ҳокимлигида ташкилот ва корхона раҳбарлари, тадбиркорлар ҳамда маҳалла раислари иштирокида йиғилиш бўлиб ўтди. Йиғилишда жорий йил 16 февралда “2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида”ги Президент қарорининг мақсад вазифалари атрофлича тушунтириб ўтилди.Дастлаб, йиғилишда туман ҳокими Абдуқаҳҳор Джурабаев сўзга чиқиб, Президентимиз томонидан қабул қилинган қарорда қуёш панелларидан фойдаланишда аҳоли ҳамда тадбиркорлар учун кенг имкониятлар яратиб берилганлиги таъкидлаб ўтди.Қарорга кўра, 2023 йилда умумий қуввати 4 300 МВт бўлган қайта тикланувчи энергия манбалари ишга туширилишини, жумладан, 2 100 МВт – йирик қуёш ва шамол электр станциялари, 1 200 МВт – ижтимоий соҳа объектлари, хўжалик субъектларининг бино ва иншоотлари ҳамда хонадонларда ўрнатиладиган қуёш панеллари, 550 МВт – тадбиркорлар томонидан барпо этиладиган кичик фотоэлектр станциялари ишга тушурилади. Шунингдек, 2023 йилда давлат-хусусий шериклик асосида 27 та йирик қувватли қуёш ва шамол электр станциялари қурилади. 20 мингта ижтимоий соҳа объектлари ва давлат идораларида кичик қувватли қайта тикланувчи энергия манбалари қурилмалари ўрнатилади. Жами 11 минг нафар тадбиркорнинг бино ва иншоотларида қуёш панеллари ўрнатилади ҳамда кичик фотоэлектр станциялари қурилади. 37 минг аҳоли хонадонларида кичик қувватли қайта тикланувчи энергия манбалари қурилмалари ўрнатилади. Қарорга кўра шунингдек, ижтимоий соҳа объектлари, давлат органлари ва бошқа ташкилотларнинг бино ва иншоотларида кичик қувватли қайта тикланувчи энергия манбалари қурилмаларини ўрнатиш ва эксплуатация қилиш бўйича масъулияти чекланган жамият шаклидаги “Яшил энергия” компанияси ташкил этилди.Йиғилишда тижорат банклари ходимлари ҳам иштирок этиб, йиғилганларнинг қизиқтирган саволларига батафсил жавоб бердилар.
